Saga Mjölnismanna er ekki löng en falleg er hún. Titilinn Stuðningsmannalið ársins 2008 í Landsbankadeild kvenna talar sennilega sýnu máli.
En um mitt sumar 2008 settust nokkrir kunningjar niður á hinu frægu Hamborgarabúllu á Akureyri og ræddu um hversu grátlegt það væri að Þór ætti ekki almennilegt stuðningsmannalið. Uppskera þessa fundar var að stofna stuðningsmannafélag sem myndi styðja við bakið á liðinu í gegnum súrt og sætt.

Tæpri viku fyrir leik gegn KA sumarið 2008 snéru menn bökum saman og mynduðu eins konar Kjarna sem var hópur af drengjum með Þórshjartað á réttum stað. Þessi smái en jafnframt öflugi hópur tók sig til og byrjaði að mæta með trommur,lúðra, gjallarhorn og fleiri aðskotahluti á leiki. Jafnt og þétt stækkaði hópurinn og undir lok þess tímabils hafði hópurinn þrefaldast eða fjórfaldast. Kjarninn hafði þá ákveðið nafn á félagið, Mjölnismenn varð fyrir valinu og voru allir mjög sáttir með það.

Næsta tímabil varð afdrifaríkt tímabil í sögu félagsins en þá tók kjarninn sig til og fór að stækka við sig, ólíklegustu menn voru farnir að láta sjá sig á leikjum, öskrandi og gólandi allar 90 mínúturnar. Mjölnismannabolir urðu til og seldi félagið bolina í tonnatali. Þar með var tekið stórt skref í áttina að verða almennilegt stuðningsmannafélag.

Undir lok þess tímabils varð stuðningsmannafélagið einfaldlega orðið það stórt að kjarninn sá ekki fram á að geta haldið utan um félagið án kosnar stjórnar. Kosið var í níu embætti og valin maður í hverju embætti. Félagið var greinilega á réttri leið og mun vonandi halda áfram að þróast í besta stuðningsmannafélagið á landinu.